FANDOM


Remote control

الريموت كونترول من لما تعلمت الحكي وأنا مفكر انو العرب هني أكتر عالم متثقفين بالدنيا , يعني ما حدا بيغلبنا لا بفكر ولا بهندسة ولا حتى بكرة القدم , من شي أسبوع أو سنة أو عمر ما بتذكر بالضبط , صابتني حالة ملل فظيعة ما عرفت شو بدي ساوي , دراسة وخلصت وشغل ما عندي , قلت لحالي يا رجل فتح هالتلفزيون على قناة عربية ما زالك عمتحن للوطن الحبيب , مسكت الريمونت كونترول والعياذ بالله . أنا كوني مثقف خزات العين وكوني من هالجيل اللي نسي وجود الكتاب والنوادي الثقافية المملة بوجهة نظر جيلي العتيد , استعنت بالله و قررت بلش بالقنوات اللبنانية على اساس انو هي أحسن القنوات ومن أحلاها .

أول محطة رحبت بعقليتي المثقفة هي قناة أل بي سي وكانوا مطلعين برنامج أسمو يمكن نجوم الأكاديمي على ستار أكاديمي , المهم هاد البرنامج يا مرحومين البي شغل شباب يعني من عمري وعمر هالشباب الكتير موديرن , فكرة هالبرنامج انو يختاروا أكمن شب وصبية حتى يساووهن فنانين , قال ناقص الوطن العربي , وطريقة الفوز هي عن طريق تصويت الجمهور , للي ما بيعرف هاد التلفزيون هو محاكاة لحياة المشتركين 24 ساعة ما بيتركوهن وحتى وهني نايمين , وخود على سفاهات و تفاهات غصباً عنك بدك تتحملها من مجموعة هالشباب والصبايا ومن أصواتهن اللي بتكشش البدن واللمس والهمس والغمز والحب والإشاعات بقصد ومن غير قصد.

قناة المستقبلEdit

قلت لحالي لك يا حبيب القلب شو بدك بهالقناة غيرها وشيلها وإذ قناة المستقبل تحتضنني بأخبارها وبرامجها, مات الحريري , قام الحريري , الحريري باني لبنان العظيم , تسقط المعارضة , النظام الامني الاستخباراتي السابق , ومصاري كب على جولات سعد الحريري حول العالم حتى يعرف مين قتل أبوه , ما منلحق نخلص من اخبار هالغر حتى نحظى برؤية معلمو , هه بين جنبلاط عالمستقبل ومثل عادتو ما بيغير الاسطوانة هالأيام , اضربوا سوريا , نظام الأسد وريف دمشق , فتنة شيعية - سنية , إسرائيل مو هي العدو , لك أنو منشان الله !! شو منشان ؟؟ أنو يعني كلو نوح وبكي وبعد شوي بدو يحطوا موسيقى حزينة ؟ صار الحريري اللي مات أهم من لبنان كلو لك واستغفر الله أهم من الخالق بعد شوي .

الفضائية السوريةEdit

خيو ما إلي إلا قناة بلدي الحبيب حابب شوف سوريا , نفسي ومنى عيني انو افتح شي مرة على المحطة الفضائية السورية وما شوف تنين عميلغوا مع بعض , لك ما ضل واحد بالعالم إلا ما استضافوا حتى جارتنا عمشه ما سلمت منهن , أنو بيوقفوا حدا بالشارع المهم انو يحكي اللي المذيع بدو ياه , و كتير من الأحيان المذيع بياخد جميع أدوار المسرحية , لك ونفس الوجوه بعدة برامج ؟؟ عندك مثلا برنامج مدارات مرة المذيع عميسأل : ما رأيك في الحكومة اللبنانية الساقطة الغير شرعية العميلة المنحطة ؟ يجيب الضيف : إن حكومة لبنان هي حكومة ساقطة غير شرعية عميلة منحطة . المتصل : أنا أقول أن حكومة لبنان هي حكومة ساقطة غير شرعية عميلة منحطة . ولي على حظي اي شو ببغاءات وعمتحكي ؟؟ لك ولا شي انو بينقد أوضاع البلد .

قنوات الخليجEdit

Remote control 1

مسكت هالريمونت كونترول ويا مهون عالقنوات الخليجية , عاش الملك , ساوا الشيخ , فات تحمم الأمير , أسعار أسهم , مال ..... مال ... يا وبلاه ! مصيبتي اني فقير و ما عندي قدرة افهم عليهون شو عم يخبصو , قلت لحالي بلكي منشوف الاخبار على محطاتنا الإخبارية فحطيت على فضائية العربية , عفواً لتسميتها بذلك فهي كالمتعارف عليها قناة العبرية , سبحانك يا الله ولا خبر عمينقد السعودية , السعودية هي الآلهة عندها وسوريا هي الهدف الأول , طبعاً انو يعني المحطة بدها رضى السعودية والسعودية بدها رضى أمريكا وأمريكا بدها رضى إسرائيل , كل خبر سيئ أو حتى إشاعة هو خبر عاجل على العربية , بتذكر بحرب أيلول على لبنان كل أخبار إسرائيل وجيشها من تحركات وصور جنود كانت تنعرض على العربية قبل حتى يمكن ما تنعرض على المحطات الإسرائيلية , هني اللي بالمحطة بيقولوا أنو هالشي للسبق الصحفي , طيب أخبار المقاومة مانها سبق صحفي ؟؟ قلبت عالجزيرة , هالمحطة هلئ صارت بعيون العرب المحطة الأولى عربياً إخباريا , بس تاع نتذكر ماضي هالمحطة كيف كان , أول يهودي بقناة عربية كان بهالمحطة بعدين كرمال الله برنامج الاتجاه المعاكس هاد برنامج ؟؟ يعني تنين ديوك وببلشوا بعض بالمسبات .

القنوات الدينيةEdit

مال إلي غير انو ارجع لربي , النورسات أو التيلي لوميير , شغلتهن بهالقناة بتحط العقل بالكف وبيخلوك تكفر رسمي إذا مسيحي , أول مرة بحياتي بشوف خوري أو قسيس واقف مقابيل غسالة ومبلش بدل أبانا الذي في السماوات يقول : أبانا شكراً لأنك خليتنا نستخدم الغسالة ..... أنو الله بعت الكاتالوج يعني ؟؟ منجي لقناة اقرأ انو الدين الإسلامي مليان تعاليم ومحطات استفهام , بس هالمحطة شي جنان , خليت الدنيا من هيك أمور وبلشت بأمور الزواج والنكاح والطلاق والخيانة و كل شي لازم يخليك تشمئز . بعرف انو لعيت كتير بس يا أخي آخرتوا هالريمونت كونترول رح تكون بالزبالة , يلعنو شو بيجيب وجع للراس وبهدلة للعرب .

مصدرEdit

  • الريمونت كونترول , بقلم المغترب السوري لوغو LOGO